नागरिक पोष्ट News

काठमाडौँ – जीउमा पेट्रोल छर्केर आफैंलाई आगो लगाएकी नुवाकोटकी पुष्पाको मृत्यु भएको छ । विवाहका लागि भएको इंगेजमेन्ट तोडिएपछि आइतबार साँझ धुम्बाराही पीपलबोटस्थित केटाको घरनजिकै आफूलाई आगो लगाएकी बुद्धनगर बस्ने नुवाकोटकी २७ वर्षीया पुष्पा न्यौपानेको मृत्यु भएको प्रहरीले जनाएको छ ।

घटनालगत्तै उनलाई त्रिवि शिक्षण अस्पताल महाराजगन्ज लगिएकामा त्यहाँबाट थप उपचारका लागि कीर्तिपुर बर्न अस्पताल लगिएको थियो । उपचारका क्रममा सोमबार उनको मृत्यु भएको हो ।

धुम्बाराहीका सुदन संग्रौलासँग उनको विवाहका लागि गत भदौ १८ मा टीकाटालो भएको थियो । पुष्पाको जन्मदिनकै दिन इंगेजमेन्ट भए पनि विवाहको मिति तय भइसकेको थिएन ।

तर, विवाहअघि घुमाउने, परिवारसँग बसेर रमाइलो गर्ने, एकअर्काप्रति माया गर्ने गरेका सुदनले इंगेजमेन्टपछि क्रमशः पुष्पालाई पटक–पटक मानसिक यातना दिएको र त्यसकै पीडा सहन नसकेर मार्न बाध्य पारेको मृतकका परिवारको आरोप छ ।

काका उत्तम न्यौपानेका अनुसार शनिबार मात्रै विवाह नगर्ने गरी इंगेजमेन्ट तोड्न सुदन, उनका बाबु दिनेश र आमा विन्दु संग्रौला पुष्पाको परिवारलाई भेट्न पुगेका थिए । त्यसपछि इंगेजमेन्ट गर्दा आदानप्रदान गरिएका गरगहना र जनैसुपारी फिर्ता लिएर केटा पक्ष निस्किएको थियो । ‘५/७ महिनाअघि मात्रै छोरीले स्नातकोत्तर उत्तीर्ण गरेपछि काम गर्न थालेकी थिइन् । हाम्रो आफ्नै शोरुममा उनी काम गर्थिन्, त्यहीं आउँदा केटासँग चिनजान भएर पछि विवाह गर्नेसम्मको सम्बन्ध भएको थियो,’ पुष्पाका काका उत्तमले भने, ‘इंगेजमेन्टअघि केटा र परिवार सबैले राम्रो व्यवहार गरेका थिए ।

दुवै परिवारबीच आउजाउ हुन्थ्यो । तर, त्यसपछि भने खै किन हो, बिस्तारै छोरीलाई मनसिक यातना दिने, अनावश्यक शंका गर्ने, अविभावकलाई फोन गरेर अनावश्यक तनाव दिने काम भयो । धाकधम्की दिनेसम्मका पनि व्यवहार हुँदै गयो, भयो । त्यही क्रममा शनिबार इंगेजमेन्ट तोडिएको थियो, त्यसको भोलिपल्ट छोरी केटाको घरनजिकै जलेको खबर आयो ।’ पुष्पा जलेको खबर पनि केटाका बाबु दिनेशले दिएको उत्तमले बताए ।

जल्दाजल्दै आगो निभाउनुको साटो ‘पुष्पाजस्तै केटी पेट्रोल छर्केर जलेको जस्तो छ’ भन्दै दिनेशले पुष्पाका बाबु पुरुषोत्तम न्यौपानेलाई खबर गरेका थिए । त्यस क्रममा बचाउन छाडेर हेरेर बस्नुले छोरीको मृत्यु नै शंकास्पद भएको काका उत्तमको भनाइ छ । केहीबेरमा प्रहरी घटनास्थल पुगेको थियो ।

प्रहरीले हत्या आशंकामा सुदनलाई पक्राउ गरी अदालतमा अनुसन्धानका लागि म्याद थप गरिसकेको छ । सुदनका दाजु मधुसुदन, बाबुआमालाई पनि नियन्त्रणमा लिएकामा सोधपुछपछि छाडिएको छ ।

पुष्पाको सोमबार नै दाहसंस्कार गरिएको छ । महाराजगन्जका डीएसपी अंगुर जीसीले पक्राउ परेका सुदनविरुद्ध आत्महत्या दुरुत्साहनको कसुरमा अनुसन्धान अघि बढाइएको बताए । उनले भने, ‘घटनाको अनुसन्धान हुँदै छ । आत्महत्या दुरुत्साहनको कसुरमा आरोपितलाई पक्राउ गरी अदालतबाट हिरासतमा राख्ने म्याद थप गरिएको छ