नागरिक पोष्ट News

सर्लाही - सर्लाहीको बाँके जंगलखण्ड स्थित पूर्व–पश्चिम राजमार्गमा माछा बोक्ने बलेरो पिकअप र यात्रुबस ठक्कर खाँदा १ जनाको मृत्यु भएको छ भने आधा दर्जन यात्रु घाईते भएका छन् । पूर्वबाट पश्चिमतर्फ आउँदै गरेको प्र ३–०१–०२५ च ५७४३ नम्बरको पिकअपले बुधबार दिउँसो सबा २ बजे विपरित दिशाबाट गईरहेको ना. ५ ख ५५१५ नम्बरको यात्रुबसलाई ठक्कर दिएको प्रहरीले जनाएको छ ।

आफ्नै साईडमा गुडिरहेको बसलाई तिब्र गतिको पिकअपले ठक्कर दिएको र पिकअपबाट जोगिन खोज्दा यात्रुबस पल्टिएको थियो । बसले च्याप्पिएर सहचालक सुनसरीको ईटहरी उपमहानगरपालिका–४ निवासी ३७ वर्षीय भीम राजवंशीको मृत्यु भएको छ । बसका चालक विदुर निरौला सहित १२ जना घाईते भएको र एकजनाको अवस्था गम्भीर रहेको प्रहरीले जनायो ।

घाईतेहरुको लालबन्दी मोडेल अस्पतालमा उपचार भईरहेको ईलाका प्रहरी कार्यालय केशरगंजले जनाएको छ । बससँग ठोक्किएको पिकअप भ्यान उछ्छिटिएर जंगलभित्रै पुगेको छ । प्रहरीका अनुसार पिकअपका चालक फरार छन् ।