नागरिक पोष्ट News

काठमाडौँ । प्रधानमन्त्री शेरबहादुर देउवाले निर्वाचनसम्बन्धी आचारसंहिताको पालनाका लागि ध्यान दिन आग्रह गर्नुभएको छ । 

मंगलबार शहरी विकास मन्त्रालयले काठमाडौंमा आयोजना गरेका राष्ट्रिय शहरी नीति, शहरी विकास ऐन र युटिलिटी करीडोर ऐन तर्जुमा सम्बन्धी परामर्श गोष्ठीको उद्घाटन गर्दै निर्वाचनसम्बन्धी आचारसंहिता लागू भइसकेकाले त्यसलाई ध्यान दिन पनि सबैलाई आग्रह गर्नुभएको हो । आगामी दिनमा सरकारी कार्यक्रमहरु आचारसंहितालाई ध्यानमा राखेर गर्नुपर्ने उहाको भनाई छ ।

त्यस्तै प्रधानमन्त्री देउवाले युटिलिटी करिडोरको अवधारणा कार्यान्वयन गर्न ठूला शहरमा आगामी बर्षदेखि नै पाइलट प्रोजेक्ट सुरु गरिने बताउनुभयो । शहरीकरणमा देखिएमा समस्या तथा चूनौतिहरुलाई सम्बोधन गर्न नयाँ शहरी नीतिमार्फत समुन्नत राष्ट्रिय शहरी बिकास र शहरी प्रणालीको बिकास गर्नुपर्ने उहाले बताउनुभयो । उहाले काठमाडौं उपत्यकामा देखिएका फोहर व्यवस्थापनको समस्या समाधानका लागि फोहरबाट ऊर्जा उत्सर्जनमा मन्त्रालयले ध्यान दिनुपर्ने उल्लेख गर्नुभयो । 

कार्यक्रममा नेकपा माओवादी केन्द्रका अध्यक्ष पुुष्प कमल दाहाल प्रचण्डले संघीय लोकतान्त्रिक गणतन्त्र र समानुपातिक समावेशी चरित्रको संविधानलाई नरुचाउनेहरुले कुनै न कुनै रुपले यसलाई विघटन गर्ने वा अर्को दिशातर्फ लैजाने कसरत गरिरहेको बताउनुभयो । उहाले विकास निर्माणसम्बन्धी कानून बनाउदा मुलकमा भएका परिवर्तनलाई सम्बोधन गर्न जरुरी रहेको उल्लेख गर्नुभयो । त्यस्तै प्रचण्डले शहरलाई व्यवस्थीत गर्ने सन्दर्भमा भएका कमीकमजोरीको समिक्षा गर्नुपर्ने बताउनुभयो ।  त्यस्तै नेकपा एकीकृत समाजवादीका सम्मानीत नेता झलनाथ खनालले मुलुकको नयाँ बिकासको खाका अनुसार प्रारुप दिनुपर्नेमा जोड दिनुभयो । दिर्घकालिन नीतिका आधार बनाएर मुलुकको बिकासको बाटो तयार गर्नुपर्ने उहाँको भनाई छ ।

कार्यक्रममा शहरी विकास मन्त्री रामकुमारी झाँक्रीले राष्ट्रिय शहरी नीति, शहरी विकास ऐनका बिषयमा सरोकारवाला सवैसंग सुझाव लिएर अघि बढ्ने धारणा राख्नुभयो ।