नागरिक पोष्ट News

पर्सा -  वीरगन्ज महानगरपालिकाका मेयर विजयकुमार सरावगी जनता समाजवादी पार्टी परित्याग गरी नेकपा एमाले प्रवेश गरेका छन् ।  वीरगन्जको प्रसौनीविर्तामा शनिबार आयोजित कार्यक्रममा सरावगीलाई एमाले अध्यक्ष केपी शर्मा ओलीले पार्टी प्रवेश गराएका छन् । २०७४ सालको स्थानीय निर्वाचनमा सरावगी तत्कालीन संघीय समाजवादी फोरमबाट मेयरमा निर्वाचित भएका थिए । त्यसअघि उद्योगी व्यवसायीको मात्र पहिचान बनाएका सरावगी वीरगन्ज उद्योग वाणिज्य संघको अध्यक्ष भएका थिए ।

मधेस आन्दोलनताका अचानक राजनीतिमा सक्रिय भएर तत्कालीन संघीय समाजवादी फोरममा प्रवेशसँगै वीरगन्ज महानगरको मेयर चुनिएका थिए । पछि जसपाका अर्का नेता तथा संघीय सांसद प्रदीप यादवसँग बढ्दो दुरीका कारण उनी जसपामा केही निष्क्रिय भएका थिए ।

दुई साताअघिसम्म उनी नेपाली कांग्रेसमा प्रवेश गर्ने चर्चा चलेको थियो । कांग्रेसका स्थानीय नेताहरुसँग उनको उठबसको चर्चा सामाजिक सन्जालमा छताछूल्ल भएको थियो । तर, कांग्रेसमा प्रवेश गरे पनि मेयरको टिकट पाउने सम्भावना कम भएपछि उनी एमालेमा प्रवेश गरेको अनुमान गरिएको छ ।

पार्टी प्रवेश कार्यक्रममा बोल्दै मेयर सरावगीले आफू एमाले अध्यक्ष तथा पूर्व प्रधानमन्त्री ओलीको व्यक्तित्वबाट पहिलेदेखि प्रभावित रहेको बताए । उनले जसपामा अहिले पनि जातिवादकै राजनीति भइ रहेकाले जातिवादको राजनीति गर्ने पार्टी कहिल्यै पनि राष्ट्रिय पार्टी हुन नसक्ने बताए । उनले एमाले नै राष्ट्रिय पार्टी हुन सक्ने बताए । सरावगीले मन्चबाटै पूर्वमन्त्री मोती दुगडले अध्यक्ष ओलीसँग आफ्नो भेट गराएपछि एमाले प्रवेश गरेको पनि सार्वजनिक गरे ।

सरावगीसँगै वीरगन्ज महानगरपालिका वडा नं १४ का अध्यक्ष भरत कुर्मी र वडा नं २५ का अध्यक्ष विश्वराज राउत कुर्मी पनि एमालेमा प्रवेश गरेका छन् । उनीहरु पनि तत्कालीन संघीय समाजवादी फोरम पार्टीबाट पार्टी अध्यक्ष चुनिएका थिए ।

यसैगरी, नेकपा माओवादीका पूर्वकेन्द्रीय सदस्य बाबुराम कौशिक पनि सोही समारोहमा एमालेमा प्रवेश गरेका छन् । समारोहमा संक्षिप्त धारणा राख्दै एमाले अध्यक्ष तथा पूर्वप्रधानमन्त्री ओलीले आफू प्रधानमन्त्री हुँदा तराईमा हुलाकी सडक तथा सिँचाईको थुप्रै काम अघि बढाएको बताए । उनले तराईमा रहेको नागरिकताको समस्याको समाधान पनि एमालेले नै गर्ने दाबीसमेत गरे ।