नागरिक पोष्ट News

काठमाडौं, ११ चैत । वाणिज्य बैंकहरूको कर्जा र निक्षेपमा उत्साहजनक वृद्धि देखिएको छ । नेपाल बैंकर्स संघद्वारा सोमवार सार्वजनिक तथ्यांकअनुसार १ महिना अवधिमा वाणिज्य बैंकहरुको कर्जा र निक्षेप दुवै उल्लेख्य रुपमा बढेको पाइएको छ ।

संघका अनुसार चैत पहिलो हप्ता २७ वाणिज्य बैंकको कर्जा प्रवाह २३ अर्ब बढेको छ । यससँगै सो अवधिमा कुल कर्जा प्रवाह ३४ खर्ब ३५ अर्ब पुगेको छ । सोही अवधिमा निक्षेप संकलन समेत १४ अर्बले थपिएको छ । यससँगै कुल निक्षेप संकलन ३८ अर्ब ४० अर्ब पुगेको संघको तथ्यांकले देखाएको छ ।

अघिल्लो महिना (फागुन)को चौथो साता वाणिज्य बैंकहरुको कर्जा प्रवाह २४ अर्बले बढेको थियो । सो अवधिमा कुल कर्जा प्रवाह.३४ खर्ब १२ अर्ब पुगेको थियो । यसैगरी सो साता निक्षेपमा ३ अर्बले वृद्धि भएर ३८ खर्ब २६ अर्ब पुगेको थियो ।

संघका अनुसार फागुन तेस्रो साता कर्जा प्रवाह २६ अर्बले थपिएर कुल ३३ खर्ब ८८ अर्ब पुग्दा निक्षेप १४ अर्बले बढेर ३८ अर्ब २३ अर्ब रुपैंयाँ संकलन भएको थियो । यस्तै सोही महिनाको दोस्रो साता निक्षेप संकलन थप १० अर्ब र कर्जा प्रवाह २७ अर्बले बढेको थियो ।

यस्तै फागुन पहिलो हप्ता निक्षेप १३ अर्बले थपिँदा ३७ खर्ब ९९ अर्ब पुगेको थियो भने कर्जा प्रवाह १८ अर्बले बढेको थियो । यससँगै सो अवधिमा कुल कर्जा प्रवाह ३३ खर्ब ३५ अर्ब रहको थियो ।