नागरिक पोष्ट News

काठमाडौं । अत्यन्तै प्रज्वलनशील पदार्थको कारोबार हुने ललितपुरको उज्वल आयल स्टोर्स नामक पेट्रोल पम्पमा  आइतबार साँझ आगोलागी हुँदा लाखौंका सामानहरु जलेर नष्ट भएका छन् ।

ललितपुर प्रहरीका अनुसार आइतबार साँझ ग्वार्खोस्थित उज्वल आयल स्टोर्समा पार्किङ गरी राखेको अवस्थाको रित्तो ट्रकबाट आगो लाग्न सुरु भएको थियो । आगोलागीबाट सो पम्पमा पार्किङ गरी राखेको चार वटा मोटरसाइकल जलेर ध्वस्त भएका छन् भने पेट्रोल ट्याङ्कर समेत जलेर नष्ट भएको छ ।

यद्यपि करोडौंको बीमा दायित्व जोगिएको छ । समयमै जुद्ध बारुण यन्त्र लगायतका अग्नि नियन्त्रकहरुको प्रयास सफल भएपछि प्रज्वलनशील स्थानमा लागेको आगो सहजै नियन्त्रणमा आउँदा करोडौं रुपैयाँको बीमा रकम जोगिन पुगेको हो । इन्धन भण्डारण गर्ने स्थानमा लागेको आगो तत्काल नियन्त्रणमा लिन नसकेको भएमा वरपरका घरहरु समेत जलेर दशौं करोड रुपैयाँको क्षति हुने थियो भने करोडौं रुपैयाँको बीमा दावी कम्पनीहरुमा पर्ने निश्चित थियो ।

तत्कालै घट्नास्थलमा पुगेका जुद्धबारुण यन्त्र, नेपाल आयल निगमको बारुण यन्त्रसहितका सहयोगमा करिब एक घण्टामा आगो नियन्त्रणमा लिइएको ललितपुर प्रहरीले जनाएको छ । घटनामा मानवीय क्षति नभएको प्रहरीले जनाएको छ ।