नागरिक पोष्ट News

नोटबाट पनि कोरोना भाइरसको फैलावट व्यापक बनेको अनुसन्धानहरूले देखाएपछि कोरोना भाइरस फैलिन शुरु गरेको मुलुक चीनले डिजिटल करेन्सी (अभौतिक मुद्रा)को प्रयोगका विषयमा गुरुयोजना नै तयार गरेको छ । 

शुक्रवार चीनको अर्थमन्त्रालयले जारी गरेको त्यहाँको केन्द्रीय बैंकको डिजिटल करेन्सीबारेको नीतिले चीन चाडै नै नोटको सट्टा विद्युतिय (अभौतिक) मुद्राको प्रचलनमा पुर्णरुपमा जाने देखिएको छ । चीनका ठुला सहरहरू गोनजाओ, हङकङ, मकाउ, बेइजिङ, तियानीन, हवेई, याङसी, लगायतका महानगरमा यसको परीक्षण प्रयोग शुरु भइसकेको छ । 

अहिले सेन्जेन, छेन्दु, सुजौँउ र जियोङ सहरमा यसको परीक्षण प्रयोगलाई अघि बढाइएको छ । त्यहाँको केन्द्रीय बैंक दि पिपुल्स बैंक अफ चाइनाले सेन्ट्रल बैंक डिजिटल करेन्सीले अघि सारेको यो प्रोजेक्टलाई अनुगमन गरिरहेको छ । 

गएको अप्रिल महिनामा परिक्षणका लागि तयार गरिएको डिजिटल करेन्सी त्यहाँका अन्य बैंकहरलेसमेत डिजिटल वालेटका रुपमा प्रयोग गर्ने भएका हुन् । अब संसारले नोटको रुपमा नभई डिजिटल युआन प्रयोग गर्न पाउनेछ । 

राज्य नियन्त्रित चीनको ग्लोबल टेलिभिजन नेटवर्कले जनाए अनुसार सो डिजिटल युआन बैंकबाट पैसा निकाल्न, भुक्तानी गर्न र पैसा स्थानान्तर गर्न समेत सकिने खालको छ । जसलाई प्रयोगकर्ताको मोबाइल नम्बरसँग जोडिएको हुन्छ । रोचक त यो छ की, डिजिटल युआनको प्रयोग गर्न इन्टरनेटकोसमेत आवश्यकता पर्दैन । 

त्यहाँको अर्थमन्त्रालयले कहिलेदेखि यो पुर्णरुपमा लागू हुन्छ भन्ने बताएको छैन । तर, चाडै नै यसको प्रयोगलाई व्यापक बनाइने चीनको केन्द्रीय बैंकले जनाएको छ । 

उता, युरोपमासमेत डिजिटल नोटको अनिवार्यतालाई स्वीकार गर्दै बेलायतको बैंक अफ इग्ल्याण्डले यस्तो मुद्रा प्रयोगको तयारी गरेको छ । त्यसैगरि, कोरोनाले अत्यधिक सताएको इटालीको केन्द्रीय बैंकले पनि डिजिटल करेन्सी प्रयोगका लागि नयाँ गाइडलाइनलाई स्वीकृत गरेको छ ।