नागरिक पोष्ट News

काठमाडौं  प्रधानमन्त्री केपी शर्मा ओलीले लकडाउनको नयाँ मोडालिटी टुंगो लगाउन २५ विज्ञहरुसँग रायसुझाव लिएका छन् । विज्ञहरुको राय सुझावपछि प्रधानमन्त्रीले लकडाउनको मोडालिटी परिवर्तन गर्ने बताएका छन् ।  देशभर लकडाउन उल्लंघन हुनथालेपछि सरकारले नयाँ मोडालिटी ल्याउन लागेको हो । ११ चैत्रबाट शुरु गरिएको कोभिड १९ को रोकथामका लागि गरिएको लकडाउन ७२ दिन कटेपछि जनजीवन निकै कष्टकर भएको छ । व्यवसायीले लकडाउन उल्लंघन गर्न थालेका छन् । पसलहरु खोल्न आव्हान समेत गरेका छन् । चौतर्फी दबाबपछि लकडाउन निश्चित क्षेत्रमा मात्र लगाउने गरी सरकारले खुकुलो बनाउँदैछ । बढी संक्रमण भएको क्षेत्र र कम संक्रमण भएको क्षेत्र तोकेर लकडाउन खुकुलो बनाउने सरकारको तयारी छ । जोखिमलाई दृष्टिगत गरी निश्चित मापदण्ड तोकेर आर्थिक गतिविधि सञ्चालन गर्न दिइने भएको छ ।

लकडाउन क्रमशः खुकुलो बनाउँदै लगिएको सरकारका मन्त्रीहरुले बताइसकेका छन् । उद्दोग व्यवसायहरु सञ्चालनको क्रममा छन् । नयाँ मोडालिटी अनुसार अत्यावश्यक सेवाका अलावा नागरिकलाई पनि निश्चित नियम पालना गरी कामको सिलसिलामा आवतजावत गर्न दिने तयारी भएको छ । उद्दोग व्यवसाय रोकथामको उपायसहितको नियम पालना गरी सञ्चालनमा आउनेछन् ।