नागरिक पोष्ट News

काठमाडौं, २९ पुस । साताको तेस्रो कारोबार दिन मंगलबार (आज) नेप्से परिसूचक घटेर बन्द भएको छ । मंगलबार नेप्से परिसूचक घटेसँगै सोमबारको तुलनामा कारोबार रकम ६८ करोड रुपैयाँ घटेको हो । सोमबार एक अर्व ७० करोड रुपैयाँभन्दा बढीको सेयर कारोबार भएकोमा आज एक अर्व २ करोड रुपैयाँको कारोबार भएको छ ।

साताको पहिलो र दोस्रो कारोबार दिन उच्च अंकले वृद्धि भएको नेप्से परिसूचक आज ७.४८ अंकले गिरावट आई ११६३.३८ विन्दुमा रोकिएको छ । हिजो नेप्से परिसूचक १५.१४ अंकले वृद्धि भई १२७०.८६ विन्दुमा बन्द भएको थियो । एक सय ८३ कम्पनीको ३७ लाख ६६ हजार ९ सय ८२ कित्ता सेयर खरिद–विक्री भएको छ ।

त्यस्तै आज सबैभन्दा बढी सेयर कारोबार प्रभु बैंक लिमिटेड प्रमोटर सेयरको भएको छ । उक्त बैंकको प्रमोटर सेयर ११ करोड ४३ लाख रुपैयाँभन्दा बढीको कारोबार भएको छ । त्यस्तै सिटिजन्स इन्भेष्टमेन्ट ट्रष्टको ७ करोड २२ लाख रुपैयाँभन्दा बढीको सेयर कारोबार भएको हो ।

कारोबारमा आएका १२ समूहमध्ये ५ समूहको परिसूचकमा वृद्धि भएको छ भने बाँकी ७ समूहको परिसूचकमा गिरावट आएको छ । उद्योग समूहको परिसूचक ९.१५ प्रतिशत सर्वाधिक वृद्धि भएको छ भने सबैभन्दा बढी हाइड्रोपावर समूहको १.१ प्रतिशत उपसूचकमा गिरावट आएको छ ।