नागरिक पोष्ट News

२०७५ को एसईई : नायिकादेखि सांसदसम्मले एसईई परीक्षा दिए

2.8K

काठमाडौँ । यस वर्ष २०७५ को माध्यमिक शिक्षा (एसइइ) परीक्षा चैत्र १० गते आइतबमार बिहान ८ बजेबाट शुरु भएको थियो ।

संघीय संरचनाअनुसार पहिलोपटक भएको एसइइ परीक्षामा देशभरबाट कूल ४ लाख ७५ हजार तीन परीक्षार्थी परीक्षामा सहभागी भएका छन् । यसअघि विकास क्षेत्रका आधारमा हुँदै आएको परीक्षा यसवर्ष प्रदेशका आधारमा शुरु भएको हो ।

परीक्षामा देशभर एक हजार ९६९ परीक्षा केन्द्र निर्धारण गरिएको छ भने एक हजार ९६९ केन्द्राध्यक्ष, तीन हजार १६७ सहकेन्द्राध्यक्ष र २९ हजार ५३५ सुरक्षाकर्मी परिचालित भएका बोर्डले जनाएको छ ।

दुई लाख ३६ हजार ४४५ छात्र र दुई लाख ३८ हजार ५५८ छात्राको सहभागीता रहेको परीक्षामा सबैभन्दा बढी प्रदेश नं ३ बाट एक लाख ६०२ परीक्षार्थी सहभागी भएका बोर्डले जनाएको छ । बोर्डका अनुसार त्यसैगरी सबैभन्दा कम कर्णाली प्रदेशबाट ३५ हजार ६२४ परीक्षार्थी सहभागी भएका छन् ।

त्यस्तै प्रदेश नं १ बाट ८३ हजार ८१८, प्रदेश नं २ बाट ७० हजार ५१८, गण्डकी प्रदेशबाट ४८ हजार ६३, प्रदेश नं ५ बाट ७६ हजार ९८३ र सुदूरपश्चिम प्रदेशबाट ५३ हजार ९७२ परीक्षार्थी सामेल भएका बोर्डले जनाएको छ ।

गत २०७४ सालमा चार लाख ६३ हजार सात सय परीक्षार्थी सम्मिलित भएका थिए ।

परीक्षाका रोचक तथ्यः नायिकादेखि सांसदसम्म

यसपटककाे एसइइ परीक्षामा चर्चित नायिकादेखि सांसदहरू समेत सहभागी भएका छन् । नायिका करिष्मा मानन्धर काठमाडौंबाट एसईईको जाँच दिँदैछिन् । नेकपाकी सचेतक शान्ता चौधरी पनि गृहजिल्ला दाङको तुल्सीपुरमा एसईईकी परीक्षार्थी हुन् ।

परीक्षार्थीहरू स्कूले उमेर १४ देखि १८ वर्षका मात्रै छैनन्, सेलेब्रिटी, जनप्रतिनिधि र बूढापाका पनि छन्। परीक्षा नियन्त्रण कार्यालयसँग एसईई दिने पाको उमेरकाको संख्या भने यकिन छैन।

चर्चित अभिनेत्री करिष्मा मानन्धरले पनि एसईई परीक्षा दिएकी छिन् । आफ्नो अध्ययन गर्ने चाहनालाई उमेरले छेक्दैन भन्ने उदाहरण बनेकी करिष्माले डिल्लीबजारस्थित विजय स्मारक मावि केन्द्रबाट परीक्षा दिएकी हुन् ।

छोरीसँगै सांसद चौधरीको एसईई

राष्ट्रियसभा सदस्य शान्ता चौधरी पनि कक्षा दशको माध्यमिक शिक्षा परीक्षा एसईईको परिक्षा दिएकी छन् । नेकपाकी सचेतक समेत रहेकी चौधरी मुक्त कमैयाबाट राजनीतिमा प्रवेश गरेकी हुन् ।

खुला विद्यालय प्रणालीमा पढेकी चौधरीले ३८ वर्षको उमेरमा सेन्टर मावि तुल्सीपुर केन्द्रबाट एसईईको परीक्षा दिएकी हुन् । चौधरी महेन्द्रमावि तुल्सीपुरमा कक्षा ८ मा भर्ना भएर पढ्न थालेकी थिइन् ।

सांसद शान्ता र उनकी १७ बर्षीया छोरी विनु चौधरीले पनि एसइई परिक्षा दिएकी छन् । विनुले काठमाडौंको आरुवारीस्थित सिर्जना बाल बोर्डिङबाट परिक्षा दिएकी हुन् । शान्ताका छोरा अनिल चौधरी जेभियर्समा कक्षा १२ मा अध्यनरत छन् ।

पढाई छाडेको ३५ वर्षपछि एसईई दिँदै वडाध्यक्ष

म्याग्दी जिल्लाको अन्नपूर्ण गाउँपालिका – ८ राम्चेका वडाअध्यक्षले पढाई छाडेको ३५ वर्षपछि एसईई परीक्षा दिएका छन् । वडाध्यक्ष खमबहादुर गर्बुजासहित तीनजना जनप्रतिनिधि एसईईमा सहभागि भएका हुन् ।

यस्तै वडा सदस्य गेममाया पुन (राममाया) र देवकुमारी खोरजाले पनि बेनीको प्रकाश माविमा सञ्चालित खुल्ला विद्यालयबाट एसईई परीक्षा दिएका छन् ।

घरबाटै एसईई दिँदै अर्की करिश्मा

बैतडी जिल्लाको देहीमाडौंकी एक छात्राले आजबाट सुरु भएको एसईई परीक्षा घरबाटै दिएकी छन् । करिश्मा बोहराले घरबाटै एसईई परीक्षा दिएकी हुन् ।

अपांगता भएका कारण मणिलेक मावि गुरुखोलामा परेको केन्द्रसम्म पुग्न नसक्ने भएपछि करिश्मालाई घरबाटै एसईई परीक्षा दिने व्यवस्था मिलाइएको हो । आवतजावतमा समस्या हुने भएकाले करिश्माका लागि घरबाटै परीक्षा दिने व्यवस्था मिलाएपछि उनी घरबाटै दिन पाउँदा खुसी छिन् ।