नागरिक पोष्ट News

टीकापुर घटनाको ३ वर्ष पुगेकै दिन उनी तनाबग्रस्त अवस्थामा महेन्द्रनगर पुगेका छन् । उनी जाँदाजाँदै गोली चलेको छ । आन्दोलन थप उग्र बन्न थालेको छ । चन्दले कमाण्ड सम्हालेको बेला टीकापुर घटना महेन्द्रनगरमा नदोहरियोस् !

सुदुरपश्चिमको कैलाली टीकापुरमा ८ प्रहरी र १ नाबालकको ज्यान जाने गरी हत्याकाण्ड भएको ठीक ३ वर्षपछि, फेरि २०७५ भाद्र ७ गते आजकै दिन सुदुरपश्चिमकै अर्को जिल्ला कन्चनपुरको महेन्द्रनगरमा गोली चलेको छ । पछिल्लो विवरण अनुसार प्रहरीले हानेको गोली लागेर १० जना प्रदर्शनकारी घाइते भएका छन् ।

प्रहरीले गोली चलाउँदा अर्जुन भण्डारा, सन्तोष कुमार कडरिया, तेजराज भट्ट सहित मनोज बुढा, सञ्जय खड्का, कृतप्रसाद भण्डारी, महेशराज भट्ट र हर्क बहादुर पाल लगायत घाइते भएका छन् । भण्डारालाई थप उपचारको लागि भारत पठाइएको छ । अरुको महाकाली अञ्चल अस्पतालमा उपचार भइरहेको छ । प्रहरीले आफुतर्फ पनि २ जना घाइते भएको जनाएको छ । प्रदर्शन नियन्त्रणभन्दा बाहिर जान थालेपछि, जिल्ला सुरक्षा समितिको बैठकले महन्द्रनगरमा बिहिबार दिउँसो ३ बजेदेखि शुक्रबार बिहान ५ बजेसम्मका लागि कर्फ्यू लगाएको छ ।

बालिका निर्मला पन्तको बलात्कारपछि हत्या भएको घटनामा “वास्तविक दोषी” लुकाएर फर्जी हत्यारा देखाएको भन्दै महेन्द्रनगरबासीले कन्चनुरका प्रहरी प्रमुख डिल्लीराज विष्टको बर्खास्ती मागिरहेको बेला, डोटीको दिपायलमा कार्यरत एसएसपी विक्रम चन्दको कमाण्डमा कन्चनपुरमा प्रहरी परिचालन गरिएको छ । हत्याकाण्डको अनुसन्धान र वास्तविकताबारे चन्दले जिम्मेवारी लिने गरी चन्दलाई खटाइएको छ । तर संयोग कस्तो परेको छ भने एसएसपी चन्द महेन्द्रनगर गएकै दिन प्रदर्शनकारीमाथि गोली चलाइएको छ ।

२०७२ भदौ ७ गते टीकापुर घटना हुँदा विक्रम बहादुर चन्द एसपी थिए, कैलाली प्रहरीको प्रमुख थिए । तीन वर्षअघि आजकै दिन टीकापुरमा भएको घटनामा २ वर्षे बालक टेकेन्द्र साउद र एसएसपी लक्ष्मण न्यौपाने सहित ९ जनाको ज्यान गएको थियो ।