नागरिक पोष्ट News

भूकम्प प्रतिरोधी घर बनाउन राज्यले दिएको पहिलो किस्ताको ५० हजार रुपैयाँको हिसाब किताब राष्ट्रिय पुनर्निर्माण प्राधिकरणले खोज्न थालिसकेको छ । 

०७३ पुसभित्र अनुदान लिएकाहरुले यो पुस मसान्तभित्र घर निर्माण गरेर दोस्रो किस्ताको आवेदन दिइसक्नुपर्ने थियो । पुननिर्माण प्राधिकरणले ६ लाख ८८ हजार लाभग्राहीसँग सम्झौता गरेर पहिलो किस्ताको ५० हजार अनुदान दिइसकेको छ । तीमध्ये करिव साँढे ४ लाख भूकम्प पीडितले घर निर्माण जारी राखेका छन् ।

पहिलो किस्ताको रकम लिएर घर नबनाउनेको हकमा के गर्ने ? प्राधिकरणमा यसबारे छलफल भइरहेको छ । यसअघिनै राज्यको अनुदान लिएर घर नबनाउनेलाई कालोसूचीमा राखेर कारवाही गर्ने र रकम फिर्ता गराउने निर्णय भइसकेको छ ।

करिब २ लाख ‘भूकम्प पीडित’ भने पहिलो किस्ताको ५० हजार बुझेपछि बेखबर छन् । उनीहरुमध्ये धेरैजसोको काठमाडौं वा अन्यत्र घर भएकाले अनुदान रकम बुझ्ने तर घर नबनाउने नियत देखिएको छ । पहिलो किस्ता लिएर घर नबनाएका तर म्याद प्राधिकरणको चेतावनीपछि धमाधम जग खनेर पहिलो डीपीसी गर्नेहरुको संख्या पनि उल्लेख्य छ ।

प्राधिकरणका सूचना अधिकारी मनोहर घिमिरे भने अनुदान रकम लिएको एक वर्षभित्र दोस्रो किस्ताको लागि निवेदन नदिनेहरुको छानविनपछि मात्र कसले ५० हजार पचाउन खोेजेको हो र कसले समस्यामा परेर घर निर्माण गर्न नसकेको हो भन्ने यकिन हुने बताए ।

घिमिरेले भने- जसले पुस मसान्तभित्र घरको जग उठाएका छैनन्, उनीहरुले समस्यामा परेर नसकेको हो भने सम्बन्धित स्थानीय तहमा निवेदन दिनुपर्छ,निवेदनका आधारमा घर बनाउनका लागि केही समय दिन सकिन्छ । नत्र अनुदान रकम फिर्ता गराउने प्रक्रिया शुरु हुन्छ ।

अनुदान लिएर घर नबनाउने तथा एक ठाउँमा घर हुँदा हुँदै अनुदान लिने दुवैलाई कारवाहीको दायरमा ल्याउन लागिएको शर्माले बताए । नक्कली पीडितहरुकै कारण भूकम्प पीडितको घर नबनेको हल्ला बढी हुने गरेको प्राधिकरणको बुझाइ छ ।

जो गाउँमै बस्छन् उनीहरुले घर निर्माण गरिसकेका छन् वा निर्माण जारी राखेका छन् । जसको अन्यत्र बसोबास छ र घर बनाउने नियत छैन उसले रातारात जग उठाएर दोस्रो किस्ताको डेढ लाख लिने दाउ गरिरहेको सूचना पनि प्राप्त भइरहेको प्राधिकरणका अधिकारी बताउँछन् ।