नागरिक पोष्ट News

रक्षामन्त्री भीमसेनदास प्रधानले चुनाव बिथोल्न खोज्ने ‘विप्लव समूहका नेता कार्यकर्ताहरु सेनाको विशेष निगरानीमा रहेको बताए ।  देशभरिका छिटपुट घट्नाहरुमा नेत्रविक्रम चन्द विप्लव नेतृत्वको नेपाल कम्युनिष्ट पार्टीको विशेष समूहको संलग्नता भएकोले ५ सय जनालाई  गिरफ्तार गरिएको रक्षामन्त्रीले स्पष्ट पारेका छन् । प्रधानले मंसिर २१ गतेको निर्वाचन सम्पन्न भएपछिमात्रै उक्त समूहसँग वार्तामा बस्ने त्यो भन्दा अघि वार्ता नगर्ने भन्दै ,‘चुनावपछि हामी उहाँहरुका माँग सम्बोधन गर्छौं, अहिले वार्तामा बस्ने समय होईन र बस्दैनौं पनि।

कसैले चाहेर पनि निर्वाचन विथोल्न केही गर्न नसक्ने दाबी गर्दै भने,‘निर्वाचन विथोल्न चाहने तत्वहरु करिब २ हजार जनाको हामीले लिष्ट बनाएका छौं, अहिलेसम्म करिब ५ सय जनालाई गिरफ्तार गरिसकिएको छ, ती मध्ये धेरै तत्वहरुको त अहिले भागाभाग भैरहेको छ।’

मन्त्री प्रधानले भोलि हुने ३२ जिल्लाका निर्वाचनमा २८ हजार ८ सय ४६ नेपाली सेना खटिने जानकारी दिए । उनले भने,‘दुवै निर्वाचनकोलागि ६४ हजार प्लस सेना खटिँदैछन्, त्यस्तै नेपाल प्रहरीको कुल क्षमतामध्ये ९० प्रतिशत यो निर्वाचनमा खटिँदैछन्, त्यस्तै हवाई अनुगमन भैरहेको छ, त्यसैले सुरक्षाको सम्पूर्ण व्यवस्था हामीले गरेका छौं।’