नागरिक पोष्ट News

 नेपाली कांग्रेसका सांसद भिमसेनदास प्रधानले काठमाडौंको ढलमा बगेर मृत्यु भएकी विनिता फुयाँलको नाममा अक्षयकोष स्थापना गर्ने घोषणा गरेका छन् । पीडित परिवारलाई सरकारले राहत दिनुपर्ने मागसमेत उनले राखेका छन् ।  व्यवस्थापिका संसदको बिहीबारको बैठकको विशेष समयमा बोल्दै काठमाडौं क्षेत्रनम्बर ६ बाट निर्वाचित सांसद प्रधानले फुयालले अध्ययन गरेको विद्यालयमा अक्षयकोष स्थापना गरेर उनलाई जीवन्त बनाइराख्ने बताए । आफ्नो एक महिनाको तलब बराबरको रकमबाट अक्षय कोष स्थापना गर्ने र प्रत्येक वर्ष सो विद्यालयका विद्यार्थीहरुलाई विनिताको नामबाट पुरस्कार प्रदान गर्ने निर्णयमा आफू पुगेको उनले जानकारी दिए । सांसद प्रधानले सडक मर्मतमा ध्यान दिन आफ्नै पार्टी नेतृत्वको सरकारको ध्यानाकर्षणसमेत गराएका छन् । नेपालटारस्थित ढलमा बगेर ७ वर्षीया बालिका विनिता फुयालको २०७४ असार ३० गते शुक्रबार मृत्यु भएको थियो । उनी युरेका माविमा अध्ययनरत थिइन् ।