नागरिक पोष्ट News

 वैदेशिक रोजगारीका लागि विदेश जान लागेकी एक युवतीसँग घुसवापत शारीरिक सम्बन्धको प्रस्ताव राख्ने प्रहरी हवल्दार पक्राउ परेका छन् ।  महानगरीय प्रहरी विमानस्थल सुरक्षागार्डमा कार्यरत प्रहरी हवल्दार महिन बस्याल पक्राउ परेका हुन् ।    महानगरीय प्रहरी परिसर काठमाडौले उनलाई सोमबार पक्राउ गरेको हो । कतार जान लागेकी एक युवतीलाई उनले आफुसँग शारीरिक सम्बन्ध राखे एयरपोर्टबाट पास गराइदिने आश्वासन दिएका थिए ।    अवैध रुपमा विदेश जान खोज्ने क्रममा ती युवती करिब दुई महिना अघि एयरपोर्ट फर्काइएकी थिइन् ।    उनले ‘आफूसँग एक रात सुते’ एयरपोर्टमा सेटिङ मिलाइदिने प्रस्ताव राखेका थिए । पीडित युवतीले त्यस्तो प्रस्तावको प्रमाणसहित उजुरी दिएपछि उनी पक्राउ परेका हुन् । हवल्दार बस्याल एक महिनादेखि फरार थिए ।   परिसरले उनलाई पक्राउ गरी थप अनुसन्धान र कारवाहीका लागि विमानस्थल प्रहरीलाई जिम्मा लगाएको छ ।    विमानस्थलका प्रहरी प्रमुख डीआईजी पंकज श्रेष्ठले घटनाबारे आफु जानकार रहेको बताए । ‘काठमाडौ परिसरले पक्राउ गरेको छ भन्ने सुनेको छु,’ उनले भने, ‘छानविन गरेपछि मात्र वास्ताविकता भन्न सक्छौ ।’    भिजिट भिसामा कतार जान लागेकी युवतीलाई अध्यागमन कार्यालय एयरर्पोटले रोकिदिएको थियो । त्यसपछि उनी हवल्दार बस्यालको सम्पर्कमा पुगेकी थिइन् ।    त्यसक्रममा उनले पैसा माग्दै एकरात आफुसँग बस्नुपर्ने प्रस्ताव राखेको पीडितले दिएको उजुरीमा उल्लेख छ ।  - (नयाँ पत्रिका दैनिक)