नागरिक पोष्ट News

लाठी खाएर रगत बगेपछि एक प्रहरी अधिकृत ‘सरी सर, थाहा भएन’ भन्दै उनी छेउ पुग्दा राणाले ‘हँ रु’ भनेपछि मात्र उनको हियरिङ मेसिन हराएको थाहा भयो । निर्वाचन आयोगविरुद्व राप्रपाले गरेको प्रदर्शनको क्रममा पशुपति शम्सेरले प्रहरीका लाठी खाएका हुन् । कान्तिपथ झडपका क्रममा प्रहरीको लाठी लागेर शम्सेरको खुट्टामा चोट लागेको छ । उनलाई हानेको लाठी छेक्ने क्रममा राप्रपाका एक कार्यकर्ताको अनुहारमै चोट पनि लागेको छ । 

आफूले लाठी खाएर घाइते हुँदा पनि प्रधानमन्त्री र गृहमन्त्रीबाट आफूले सहानुभूति समेत नपाएको गुनासो पनि राणाले गरे भने, ‘कुनै कारणबिना आक्रमण भयो र उहाँहरुले फोन गरेर मेरो अवस्थाबारे सोधीखोजी पनि गर्नु भएन ।’ राप्रपाले पार्टीको विधानमा रहेको हिन्दुराष्ट्र र संवैधानिक राजसंस्थाको विषय निर्वाचन आयोगले हटाएको विरोधमा निर्वाचन आयोग अगाडी प्रदर्शन गरेको हो भने सो विरुद्ध आयोगलाई ज्ञापनपत्रसमेत बुझाएको थियो  । 

तत्कालिन श्री ३ महाराज मोहन शमसेर जंगबहादुर राणाका नाति पशुपति शम्सेर जबराले जन्मिनासाथ जर्नेलको दर्जा पाएका थिए । रोलवाला राणामा ‘क’ श्रेणीका पशुपति समशेर जन्मिँदै श्री ३ महाराजका दावेदार थिए । त्यसैले उनलाई राणा शासन ढलेपछि पनि नेपाली राजनीतिमा ‘नाति जर्नेल’को नामबाट सम्बोधन गरिन्थ्यो ।

पञ्चायतमार्फत राजनीतिमा प्रवेश गरेका राणाले आफ्नो राजनीतिक जीवनमा राज्य पक्षको दमन कहिल्यै सामना गर्नु परेन । उनले राजनीतिक जीवनमा कहिल्यै आन्दोलन वा सडक संघर्ष गरेनन् । तर, ७७ वर्षको उमेर सोमबार सत्तारुढ दलको शीर्षस्त नेतृत्वको हैसियतमै उनले प्रहरीको लाठी खाए । जुन उनकै शव्दमा ‘राज्य पक्षबाट’ खाएको पहिलो लाठी हो ।