नागरिक पोष्ट News

 हार्दिक श्रद्धान्जली !!  रामेछाप क्षेत्र नं २ का नेपाली कँग्रेसका नेता एवं पूर्व सहायकमन्त्री रामहरी ढूंगेलको ह्रृदयघातबाट निधन प्रति गहिरो शोक प्रकट गर्दै मृत आत्माको चीर शान्तिको कामना सहित हार्दिक श्रद्धान्जली !! गरीब नेता रामहरी ढुंगेल जो सुतेकै ठाउँमा अस्ताए एउटै घरमा २० वर्ष बिताएका रामहरि ढुंगेलका लागि डिल्लीबजारको डाँडो भन्दा प्यारो ठाउँ काठमाडौंमा अन्त कतै लागेन ।  भाडा लिने महिलाले ढुंगेलको दैनिकी देखेर कहिले कहिले भाडा बढेको छ, अन्तै कोठा सर्नु भन्ने गर्थिन् तर किन हो, ढुंगेलले कहिल्यै त्यो कोठा छाडेनन्’  अन्ततः उनले यहीँ प्राण त्यागे,’ त्यही घरमा भाडामा बस्नेले भने ।

उमेरले ६० वर्ष कटेका ढुंगेलले सुतेकै अवस्थामा मृत्युवरण गर्दा परिवारका अन्य सदस्य कोही थिएनन् । उनलाई कोठामा तातोपानी तताएर खुवाउने पनि कोही थिएनन् ।

रामहरि एक्लो नहोउन् पनि किन ? रामहरिले जीवनमा विवाह नै गरेनन् ।

रामहरिको जीवनशैली जस्तो सादगी थियो, उनको स्वाभाव पनि त्यस्तै थियो । उनी कसैलाई भनी बिझाउँदैनथे । त्यसैले त जिल्लामा उनलाई कांग्रेस भएता पनि कम्युनिष्टहरुले पनि उत्तिकै सम्मान गर्थे ।

तर, कोठामा खाना पकाएर खुवाउने कोही नभए पनि रामहरि एक्लो भएनन्, उनले जीवनमा धेरै इष्टमित्र र आफन्त कमाए ।

ढुंगेलको अन्त्येष्टिपूर्व नेपाली कांग्रेसले उनको पार्थिव शरीरलाई विहीबार पार्टी कार्यालय सानेपामा राखेर सम्मान प्रकट गर्‍यो ।

रामेछापको पकरबास गाविसमा ढुंगेल मध्यम वर्गको सामान्य परिवारमा जन्मिएका हुन् । कांग्रेस नेता रामहरि ढुंगेलले ०५६ सालको चुनावमा रामेछाप क्षेत्र नं २ बाट चुनाव जितेका थिए । सो क्षेत्रमा उनले एमालेको समेत समर्थन पाएका अमिक शेरचनलाई हराएका थिए । सोही क्षेत्रबाट ०४८ सालमा चुनाव जितेका पूर्वसांसद कमल चौलागाई नेकपा मालेबाट चुनाव लडेर तेस्रो बनेका थिए । रामहरी पञ्चायतकालमा नेपाल विद्यार्थी संघबाट कांग्रेसको राजनीतिमा प्रवेश गरेका हुन् । पञ्चायतकालको उत्तरार्धमा भएको स्ववियु चुनावमा उनी त्रिचन्द्र क्याम्पसमा नेविसंघका तर्फबाट स्ववियु सभापतिमा विजयी भएका थिए ।

सांसद बनेपछि केही समय सहायक मन्त्री बनेका ढुंगेल राजनीतिमा त्यो भन्दा माथि कहिल्यै जान सकेनन् । त्यसो त ०६४ सालको पहिलो संविधानसभामा पनि नेपाली कांग्रेसले उनलाई रामेछाप २ मा टिकट दिएको थियो । तर, सो चुनावमा ढुंगलले जीत हासिल गर्न सकेनन् ।