नागरिक पोष्ट News

 काठमाडौँ । शुक्रराज ट्रपिकल तथा सरुवा रोग अस्पताल टेकुमा आएका एकजना बिरामीमा स्वाइन फ्लु भाइरस फेला पारेको छ ।  अस्पतालका सरुवा रोग विशेषज्ञ डा. शेरबहादुर पुनका अनुसार एक हप्ताअघि अस्पताल पुगेका ५० वर्षीय पुरुषलाई स्वाइनफ्लुको संक्रमण देखिएको हो ।

रुघाखोकी निको नभएपछि स्वाइनफ्लुको आशङ्कामा परीक्षण गर्दा स्वाइनफ्लु पुष्टि भएको डा. पुनले जानकारी दिनुभयो ।  उहाँले स्वाइनफ्लु सरुवा रोग भएकाले तथा एक अर्कामा छिट्टै सर्ने भएकाले सचेत हुनुपर्ने बताउनुभयो । ‘सामान्यतया जाडो महिना सकिन लाग्दा कुनै न कुनै संक्रमक हुन सक्छ’, डा. पुनले भने, ‘गत वर्ष हङकङ फ्लुले सताएको थियो भने यो वर्ष स्वाइनफ्लु देखापरेको छ ।’

खोकी लागिरहे, घाँटी खसखसाइरहे, १० दिनसम्म पनि कडा ज्वरो आए, बालबालिकामा ज्वरोसँगै बान्ता हुने, पखाला लाग्ने भएमा स्वाइनफ्लु भएको हुनसक्ने भएकाले यस्तो लक्षण देखिने बित्तिक्कै चिकित्सककहाँ जानुपर्ने डा. पुनको सल्लाह छ ।

दमका रोगी, मुटु रोगी, वृद्धवृद्धा, पाँच वर्षमुनिका बालबालिका र अङ्ग प्रत्यारोपण गरेका व्यक्तिलाई फ्लु छिटै सर्न सक्ने भन्दै सतर्क रहनुपर्ने उहाँले बताए ।